Portada
Este é un proxecto pensado para os colexios, onde se pode atopar información sinxela, pero fiable sobre as aves e as plantas que se poden ver con máis frecuencia na provincia de Ourense. Pretende servir de ferramenta para paseos co alumnado, no que se pode, por exemplo, levar un caderno de campo onde recoller observacións que despois se contrastan nesta guía.
A idea naceu cando intentaba atopar guías en internet para o meu traballo na aula. Ou tiñan demasiada información, ou esta información era demasiado complicada, ou as buscas resultaban difíciles, ou as fotografías non axudaban á identificación, ou os nomes non coincidían cos usados en Ourense, ... Atopei un problema engadido cando a asignatura de Ciencias Naturais se imparte en inglés. En fin, non eran prácticas. Así que decidín recoller a miña propia información. Agora decidinme a compartila, e ó mesmo tempo, invitar á xente a que a perfeccione.
Para lograr un pouco de coherencia, tratei de empregar o galego propio do sur da provincia, en concreto de San Xés de Lobeira. Lembrade pronunciar os "g" aspirados (/h/).
Ademais de servir como guía, ó tratarse dunha wiki, pódese traballar co alumnado colaborativamente, en forma de proxecto, para enriquecer esta páxina. Aportando máis fotografías, debuxos, detalles interesantes, etc.
É de xustiza mencionar o traballo de Secundino Lorenzo Fernández, que elabora a excelente páxina Ríos Galegos. A información aí compilada é dun extraordinario valor.
